Во рамки на проектот „Заедно кон Европа: Мултиетничка иницијатива за европска иднина за сите генерации“, на 23 септември 2025 година во просториите на ГРИН ХАБ Кочани се одржа панел-дискусија со наслов „Европски вредности на дело: Инклузија и одржливост низ граѓанскиот сектор“. Настанот имаше за цел да ја истакне улогата на граѓанските организации во промоцијата на европските вредности – еднаквост, инклузија и одржлив развој – и нивниот придонес кон процесот на ЕУ интеграција.
На панелот учествуваа претставници од локалниот граѓански сектор, млади активисти и граѓани, кои споделија свои искуства и добри практики. Тие зборуваа за предизвиците и успесите во промовирањето на инклузивни политики и еколошки иницијативи, како и за активностите насочени кон заштита на правата на малцинските групи.
Дискусијата отвори важни теми за соработката со локалните власти и со другите организации, за начините на мотивирање на младите да станат активни граѓани и за идните чекори во зајакнување на инклузивните и одржливи иницијативи.
Панелистите се согласија дека граѓанските организации имаат клучна улога во практичната примена на европските вредности и се двигател на позитивни промени во заедницата. Преку партнерства, младинска енергија и конкретни акции тие придонесуваат за изградба на поинклузивно и одржливо општество.